“行东道”就是打赌个意思，以打赌个方式决定输特个人请赢个人吃饭。所以，出钞票请客就讲作“做东”。不过，辣大多数情况下头，“行东道”只是“行行”而已，输特个人未必非要“做东”。

　　

个么，“行东道”个“行”，到底是读“hang”还是“wang”呢？

　　

垃老早个吴方言里，“行”字有两种读法，只有辣方言文白中才读“xing”，土话里基本浪侪读“hang”。比如：行为、行头、行船等中个“行”侪读“hang”。甚至“今年流行紫色”，上海人也只讲“今年行(hang)紫颜色”。

　　

方言中个“行”又同“扛”，即硬仔头皮来一趟。比如,没啥钞票个旁友到了老高级个餐厅，就可以讲：“今朝就是‘老虎肉’也要行一记了。”（老虎肉，很贵的意思。）

　　

但是，从上世纪70年代以后，上海闲话就开始“走样”了。小青年大多侪讲“wang东道”，或者“我帮你wang伐”。一音之差，就让后来人老难理解“wang东道”个词义来源了。至于，为啥会变化，可能还是因为发音相近个关系，乃末就成了方言里个奇音怪字。

　　

类似个还有“行情行市”。吴方言里拿“许许多多”讲成“行情行市hang jin hang si”。细想起来，搿词蛮怪个。为啥“行情”搭“行市”跟“多”有的啥关系呢？