1、轧

最常见个意思就是“挤”。早浪上班高峰时段，公交车浪，地铁里侪是人，要想上去就要拼命“轧”。“三只手”也欢喜“轧”公交车，伊拉要个就是人多，趁混乱就拿人家口袋里个皮夹子“轧”到自家口袋里了。小偷拿搿种行为叫做“轧轮子”。

2、钝

上海人拿讽刺、挖苦讲作“钝”。钝刀子割肉，见痛勿见血，于是当上海人识破对方是辣讽刺，挖苦自家，就会讲：“我晓得侬是来钝钝我额，我譬如当补药吃。”

3、模子

一开始搿词是贬义个。辣旧上海小说，电影里，经常能看到流氓头子训斥人家为“瘪三模子”、“赤佬模子”、“小刁模子”。后来，逐渐变成了褒义词。形容一个人做事体“上路”，有义气。

4、打朋

开玩笑，寻开心，有眼恶作剧个意思。比如我搭侬讲“十五号我请侬吃饭”。结果，侬15号特特为为从五角场跑到莘庄，发觉扑了只空。后来才搞清爽，我讲个是农历十五。侬就可以讲，“旁友，哪能意思啦，侬打朋咯”。打朋，是朋友之间常有个事体，小来来可以促进友谊。如果真额勿怀好意，就有眼“恶势做”个意思了。

5、上腔

上腔，是一个人对另外一个人个挑衅，通常会得提高声音，接下来就是吵相骂了。当发生争吵个辰光，一方就会得讲“侬今朝是要上我腔了咯？”，另一方也会反问：“侬上啥个腔啦？”。有辰光，小囡没来由个开始哭闹，爷娘也会讲：“今朝上腔了”。