上海第一家肯德基，垃1989年开业，地址是外滩2号，伊个前身是东风饭店，再前头是上海总会。现在，外滩2号已经变成了高档大气个华尔道夫酒店。

小辰光，吃肯德基是老开心，老难般个事体。一般是逢年过节，或者考试得了好成绩，爷娘才会带牢小囡去吃个。

肯德基刚刚开业，面对新进来个洋快餐，上海人还勿晓得是卖啥个。有种客人跑进去就对牢店员讲：“拨我来一斤鸡”或者“拨我一只鸡”。还有客人勿会用塑料叉子，问店员要筷子。甚至，有种顾客是拿锅子来买鸡个，要带回去拨屋里厢个人一道吃。搿大概可以算是第一代个“外带全家桶”了。

我老怀念老早肯德基个“土豆泥”，因为便宜，味道又赞。垃肯德基里做作业也变成了一种记忆。可惜，后首来个土豆泥米道变脱了。