上海老早有一出滑稽戏：旧上海被划成公共租界、法租界、华界，而华界又分南市搭闸北，搿种现象叫做“三界四方”。各界各方侪是一个独立个市政系统，大家侪以自家个方式搭马路起名字。于是，宁波路就有公共租界宁波路搭法租界宁波路；今朝个大田路老早叫大通路，搭闸北个大统路发音完全一样。勿熟悉上海道路个人辣上海寻地址是老困难个。

搿能介，滑稽戏里就用“断钢丝路爆胎路”来形容上海路名复杂而给市民带来勿方便个情况。意思就是：如果侬踏脚踏车辣上海寻地址，可能拿脚踏车个钢丝踏断特了，轮胎也踏爆特了，还是寻勿着侬想寻个地方。

上海个“虬江支路”和“宝山路”辣虹口区搭闸北区个分界线高头，搿搭是两区个结合部，治安比较混乱。搿搭曾经有上海最大个脚踏车二手车市场，修车摊头也交关 多。老早上海生产的脚踏车质量相当好，老少需要拿出去修额。有种修脚踏车个摊主就开始动坏脑筋，伊拉辣海深更半夜个辰光，迓迓叫到附近个弄堂里，拿人家好个脚踏车弄坏特——钢丝弄断，好个轮胎凿破。搿能介，人家就勿得勿来修脚踏车了。辣上海闲话当中，“虬江支路宝山路”搭“断钢丝路爆胎路”读音接近，搿就是阿拉问题个答案，侬猜对了伐？