旧上海犹太房地产大王哈同小辰光靠拾破烂为生，后来到了上海，通过贩卖鸦片搭做房地产积起巨额财富，成为“远东第一大富翁”。哈同先后做过上海法租界公董局搭公共租界工部局个董事，差勿多控制了上海南京路（今南京东路）一半地皮。1904年春，哈同决定花费70万银元造上海最大个私家花园爱俪园（俗称哈同花园），并且仗着租界当局撑腰，垃静安寺个东面（今上海展览中心一带）用竹篱笆圈地。凡是被划入个地皮，住个人家全部强行拆迁；勿服从个，就用断水、封门咾啥相逼，交关居民勿得勿搬场。

沪上名医“张聋甏”个祖坟也垃被圈范围个东南角，“张聋甏”蛮有骨气，拿定主意勿让哈同为所欲为。老早上海有过一句流行语：“生了伤寒病，快寻张聋甏。”“张聋甏”原名张骧云，屋里世代行医。伊垃年轻个辰光，有一趟去搭人家看毛病，勿当心感染病毒，造成听力下降，乃末要靠自制个“喇叭筒”助听应诊，所以得了“张聋甏”别名。“张聋甏”长期从事伤寒病个研究，专门为医迭种毛病研制出“张家膏”，以“张聋甏，一帖药”名扬江南。“张聋甏”个诊所设垃自家屋里，搿是一座造垃上海爱文义路（今朝个北京西路）文安坊个五进宅院，各地个人侪赶过来排队求医。埃个辰光，上海个私人诊所挂号费侪超过半块银元,“张聋甏”只收两角两分，是收得最低个。

哈同晓得 “张聋甏”个名气，就对迭个“钉子户”先来软个，但呒没起作用；伊马上翻面孔来硬个，关照施工队勿管三七廿一动手建园。1910年秋，占地一百七十多亩个爱俪园造好了，迭座私家花园个设计以中式为主、西式为辅，小桥流水，亭台楼阁，景色幽雅宜人。

“张聋甏”对哈同一点勿买账，伊利用上海公共租界个法律条文拿迭个外国冒险家告到会审公廨搭英国驻沪领事馆，打了一场马拉松式个官司。上海各界也提出抗议，积极声援“张聋甏”。经过长达十多年个诉讼，会审公廨最后因为受到社会舆论个压力，加上“张聋甏”据理力争，只好作出判决：哈同勿能侵犯张家坟址，爱俪园必须另外开条小路拨张家垃祭祖个辰光进出。哈同拿爱俪园比作大观园，看成颐和园，呒没料到最后要垃里向长期保留一块坟地；伊虽然觉着大煞风景，心里邪气勿开心，但最后还是勿得勿承认输脱。

哈同花园(1910年)