文/沈嘉禄

　　搿个几天，美术界朋友侪辣谈论赵无极先生故世个事体，我也自然想起1999年深秋，他辣辣上海办个人画展个辰光，对伊做专访个情景。伊住辣花园饭店，搿天一早我就跑过去了，辣辣咖啡厅里见了面。伊已经毛八十岁了，一头白发，穿一件黑大衣，身板挺刮，正宗老克勒。本来以为要配个翻译个，想不到伊一开口就讲：“我个上海闲话讲得好来西，要啥翻译？”伊个上海闲话听上去软绵绵，糯答答个，老上海腔调。

　　伊跟我回忆起出国后第一次回上海个情景。搿个辰光已经是1972年了。伊讲：“埃辰光，我第二个太太陈美琴刚刚生病去世，而我个娘也失去了伊个丈夫。我爷曾经是个银行家，以前家境还算不错个，阿拉一家门住辣永嘉路浪一幢小洋房里。文化大革命一来，屋里向拨抄得一塌糊涂，伊是一个银行家呀，辣辣老底子也算是见过世面个，现在天天辣辣里弄里打扫公厕，落魄到迭种地步，觉得老没面子个。结果呢，积郁成病，过了呒没多长时间就走了，还不到七十岁。我回到上海看我娘，感觉浪上海迭个地方老陌生个，一点也不像我想象当中个故乡。我陪我娘讲讲闲话，不过房间里冷嗖嗖个，窗门漏风，又呒没热气，我哪能吃得消？第二天就搬到和平饭店里去住，日里向再回到永嘉路陪娘讲闲话。”

　　过仔两年，赵无极又回过上海一次，这次情况好点了，伊就带仔娘到北京、苏州、常州等伊生活过个地方转了一大圈，伊老娘白相得比较开心。到了1995年，妹妹打越洋电话拨赵无极，告诉伊老娘病危，经常处于昏迷状态。赵无极马上动身回国，来到病榻边浪，老娘已经认不出迭个儿子了。“我娘生个是糖尿病，到仔迭个辰光呼吸也困难了。医生建议辣伊个喉管动手术，我不舍得让伊再吃无谓苦，坚决不同意。我辣病床前守了几天，也不晓得伊啥辰光能够好转，迭个辰光法国又有要紧事等着处理，就回去了。半个月后我娘就走了。”

　　赵无极讲到搿搭拿出一张照片拨我看：“侬看看，我娘是一个旧时中国妇女，很老派、很善良个一个人。我永远怀念伊。”

　　一张黑白照片，赵无极个娘坐辣旧沙发里，而伊斜坐辣沙发个扶手浪，像小囡一样紧偎辣娘个身边。两个人一道看镜头，努力要做出一种世俗个微笑，不过眼睛里难掩一丝悲戚。

　　1982年赵无极又回了一趟故乡，伊个第三任太太弗郎索瓦兹·马尔凯跟伊一道来。法国太太对东方文化怀有敬畏之感，对一切侪充满了兴趣。第二年赵无极应母校浙江美院邀请，带仔太太来到杭州，一个月里两家头一搭一档为前来进修个教师讲课。课堂浪，赵无极愤怒声讨信奉教条主义个苏联学派，鼓动学生仔摈弃搿种模式。下课后，伊突然想起浙江美院个校长正是留苏个，搿记头晕啦，马上跑到校长办公室向老朋友道歉。迭位校长听仔哈哈大笑：我正想背叛自己唻！

　　现在大家不大讲起伊个囡儿，搿天头伊倒跟我讲起，囡儿名叫赵善美，从18岁起就当上了时装模特儿。一个东方姑娘辣世界时装业中心个巴黎走上了T型台，老勿容易个。“就是啊，巴黎人傲慢，巴黎以外地方个人，辣伊拉眼睛里侪是乡下人。所以我迭个囡儿了不起。”伊讲。