文/邵永平

　　上海人熟悉个筱声咪走了，迭个兄长一生一世跟滑稽分不开！

　　筱声咪生前透露，解放初期伊从听电台开始热爱滑稽，崇拜姚慕双、周柏春，由于屋里向买勿起无线电，经常捧仔饭碗头到邻居搿搭听电台里个放歌沪剧名家邵滨孙、筱爱琴个《说说唱唱》。伊1950年正式从艺，先后拜筱咪咪，杨华生为师父。筱声咪迭个人悟性邪气高，平常曲勿离口，是剧团里重点培养个尖子。1963年由海燕电影制片厂投拍《如此爹娘》个辰光，伊已经30出头了。不过筱声咪初次“触电”就演活了调皮贪白相个小宝而一举成名。剧中杨华生、绿杨演爷娘，两位长辈中等身材为难了比伊拉高出交关个儿子，筱声咪突发奇想，伊拿自己垃屋里养个一只猫个动作，比如讲蹬、跪、躺、躲、跑等特定动作接界到演技浪来，人赛过就可以矮忒一局。

　　筱声咪“文革”期间曾垃拉城隍庙里向当棉花店营业员，1979年是筱声咪艺术个第二春天，伊进入了上海广播电视艺术团，以独脚戏身份重返舞台，成为台柱，并搭档大块头孙明。当时筱声咪夫人中风卧床勿起，伊上半天安排好老婆个药理膳食，下半日就跟孙明探讨创作题材。伊拉出品个段子往往路子奇、手法怪、观众乐。像普法教育《现身说法》、背后议论《流言蜚语》、科普知识《机器人》、菜场模范《一棵菜心》等60多只节目深受观众喜爱，而迭些原创执笔多数为筱声咪本人。生活当中个筱声咪风趣幽默，有一趟伊个朋友患了百日咳看病吃药呒没效果，托筱声咪寻一位有水平医生，齐巧筱声咪认得一家医院专看百日咳医生，垃拉出租车浪，筱声咪搭病人一路攀谈了半个多钟头，等到了仁济医院门口，筱声咪“命令”司机原路开转去，朋友问为啥？筱声咪讲：“我跟侬一直垃讲闲话，侬一记咳嗽也呒没，是我筱医生看好个。”打棚之后三人走进医院，搿个朋友有点近视眼，勿留心头撞垃拉墙浪，筱声咪又调侃：“人家墙头多少文明，侬撞上去伊一点声音也呒没。”弄得朋友啼笑皆非。

　　归纳筱声咪表演特色：邻里攀谈勿失大气；说学做唱浑然一体；噱头铺排勿露痕迹；真真假假白相有趣。让同行服帖伊拉段子里常常出现“真生活”。伊60多岁为了演好《梁祝化蝶》，就到上海芭蕾舞团登门求教；演《学跳交谊舞》就到舞厅报到；演《告别演唱会》跳踢踏舞、迪斯科；唱流行歌曲一样勿少。筱声咪是独脚戏个非物质文化传承人，伊拿自家创作个每一个段子侪当成自家个生命。