记得搿辰光，每条弄堂里侪摆了一只泔脚甏，乃末每家人家个淘米水，拣下来个菜叶瓣，吃下来个鸡骨头、鱼骨头咾啥侪会得倒进去，每日有专门人来收集，随后拿迭只甏汏了清清爽爽。

　　屋里向个干垃圾，大多数侪送拨废品回收站，搿辰光个废品回收站老多个，出门勿到五分钟就有固定个回收站，有辰光还有人摇铃上门来收购。回收个品种也邪气多，像玻璃，报纸，书籍，破铜烂铁，牙胶管，桔子皮，鸡肫皮，甲鱼壳，甚至头发也可以收。

　　只要侬想要掼脱个物事，基本浪向废品回收站侪可以统吃。搿能介一来，真正掼辣垃圾桶里向个物事就只有一眼眼了。废品回收收去个物事还好重新发挥作用，老百姓也好调眼小菜铜钿。

　　勿晓得啥辰光开始，泔脚甏取消脱了，废品回收站也一只只关脱了，乃末屋里向要掼脱个物事寻勿着出路，只好朝垃圾箱里厾，垃圾越来越多，污染空气，破坏环境。

　　乃末现在正规个废品回收侪呒没了，只有一眼游击队辣拉南征北战，收购个品种也老少个，只有报纸杂志书籍，包装盒咾啥，而且价钿便宜得要死。

　　有辰光几个号头积下来，只调来几块洋钿，葛咾有种人也勿肯花搿眼心思，干脆往垃圾箱一厾了事。葛咾有辰光想想老底子个废品回收就蛮贴近环保要求个，勿晓得为啥搿能好个传统要掼脱。