文/陆茂清

　　

配音/丁婷婷

　　

崇明老年纪人侪记得，春三二月里个辰光，勿少人家开始断粮，到田里拿要派肥料用的草头剪下来，和点麦粞、豆渣烧粥，或者白煠了填填肚皮。春里草头长了快，剪子长，长子剪，再长再剪，帮穷人度过了青黄勿接个难关。

　　

搿种情况一直延续到解放，人民政府领导土地改革，穷人分着地皮，口粮勿缺了，也就勿要草头充饥了。

　　

哪晓得三年“困难时期”，又要靠草头填肚皮了。公社食堂开办个辰光，敞开肚皮吃饭，鼓足干劲生产，勿多几时吃饭变子吃粥，朝后粥也吃勿饱了，食堂解散，社员回到屋里自家烧，只供应一眼眼杂粮，根本勿够吃。生产队里个草头又派了大用场，和垃杂粮里烧，连汤带水又当饭又当菜。

　　

解放前后，崇明勿少人家靠了草头苦寒度，直到现在还记垃心浪，还有人叫伊“救命草头”唻！

　　

现在个日子越来越好，大鱼大肉勿稀奇，不过也有蛮多个人，对羊吃吃鸡啄啄个草头另眼相看。为啥道理呢？除了老里八早搿份特殊感情外，还有原因。

　　

草头从种下去到过冬到开春，天气一直蛮寒冷，搿段辰光勿会得有病虫害，告咾也勿会打药水，属于硬碰硬个无公害绿色食品；再有大家侪晓得，草头里铁元素，胡萝卜素含量多，专家美称为“健康美食”“保健蔬菜”，因此经常出现垃千家万户个台子浪。

　　

原本勿起眼个草头身价变高了，陈年夹新年个辰光，一斤要卖到10块出头。电视里、报纸浪有过介绍，生煸草头上了“上海特色菜肴”榜，爿爿饭店、宾馆里侪有个，交关吃客当伊“保留节目”，总归要点个。亲眼看见过好几趟，荤菜吃来厌气相个辰光，碧绿爽青的生煸草头上来了，大家来勿及伸出筷子去搛，一歇歇盆底朝天！像抢三十一样话：“吃垃勿煞念，再弄一盆来！”