文图/阿仁

北京人形容与自己从小辣一道白相、一同长大个好朋友为“发小”。依上海人个讲法，搿样子个朋友叫“出窠兄弟”。还是相当生动个，从一只窠里孵出来个、情同手足个朋友当然可以拜为兄弟。好像有点重男轻女，只有出窠兄弟，还呒没听到过出窠姐妹。

我个出窠兄弟里是有交关女同学个。阿拉是从一个小学里走出来个。学堂个旧名称是磐石私立小学，新校名是卢湾区重庆南路第二小学。简称，重二。经过半个多世纪个变迁，重二变成过中学，又变成过聋哑人学校。最后退出历史舞台，只有老个教育楼还矗立辣重庆路上。人去楼空了。出窠兄弟姐妹几十年里一直呒没间断过联系。常常碰头个有十几个，重大节日可以聚起几十个。前一个重大节日是兄弟姐妹大家都60岁了。大家一道来吃生日蛋糕唱生日歌。上一个重大节日是相互之间已经认识60年了。也就是讲，大家跨进同一所小学一道读书有了一个甲子个岁月了。大家都活到67岁了。下一个重大节日是出窠兄弟姐妹一道来做70大寿。出席要胸佩官方派司，证件即是“老人卡”。最佳方案是去公交公司借一部拉卡机放在门口，进门请拉卡，机器响了方才可以登堂入室吃碗长寿面。

别人家最惊叹个是阿拉个小学同学会竟然可以集合起大半个班级。窍门是必须培养推举出一个联络副官“栾平栾副官”。伊要尽心尽力搜集情报绘制出一份联络图。啥人动迁了，啥人搬场了，啥人出国了，啥人还乡。还有叫人伤心个资讯——啥人走脱了。毕竟勿会人人都可以长命百岁个。我最怕麻烦、最怕记人头。但我最习惯做督促大员。我年年岁岁督促栾副官、让伊勿敢有一丝偷懒个功夫。由此一旦吹响集合号，就是孵辣美国过日脚个同学也一定会飞回上海来。

走上社会结识个朋友，上海闲话称搿样个交往为“朋友道里”。一个人个一生会有交交关关朋友道里。数量最多个朋友道里当然是同一单位里个同事了。大家8个钟头一道共事，关系勿会亚于家人亲戚。质量最高个朋友道里肯定是同过患难，甚至共过生死个同志了。上海人把搿样个生死之交称作为可以割脱头爿个朋友。有搿样朋友个人一定是经历过风风雨雨磨难、人生经历折腾曲折个脚色了。要是一生太平，无虑无愁，有一群出窠兄弟，有一堆朋友道里，搿也就是福气十足了。